आजरा येथील शतकोत्तर सुवर्णमहोत्सवाकडे वाटचाल करीत असलेल्या श्रीमंत गंगामाई वाचन मंदिरातर्फ दिनांक ३ ते ५ जानेवारी २०२६ दरम्यान व्याख्यानमालेचे आयोजन करण्यात आले आहे. शनिवार दि. ३ जानेवारी रोजी सुप्रसिध्द हृदयरोग तज्ञ डॉ. अक्षय बाफना कोल्हापूर यांच्या 'तंदुरूस्त हृदय : निरोगी जीवन' या व्याख्यानाने व्याख्यानमालेची सुरवात होणार आहे. रविवार दि. ४ जानेवारी रोजी जैवतंत्रज्ञान शास्त्रज्ञ डॉ. विश्वास बापट कोल्हापूर यांचे 'वनस्पती : बहुमुल्य, बहुगुणी वरदान' या विषयावर व्याख्यान तर सोमवार दि. ५ जानेवारी रोजी मिशन ऑरगॅनिकचे संस्थापक राहुल टोपले आजरा यांचे 'नैसगिक शेती आणि विषमुक्त जीवन' या विषयावर व्याख्यान होणार आहे.
ग्रंथालयातर्फे देण्यात येणाऱ्या विविध पुरस्कारांचे वितरणही याप्रसंगी होणार आहे. यावर्षी भूमिपुत्र साहित्यिक गौरव पुरस्कार श्री अनिल परूळेकर (गोवा), माता गौरव पुरस्कार श्रीमती सरीता समीर घेवडे (भटवाडी), उत्कृष्ठ वाचक पुरस्कार श्री गजानन भिमराव अपसंगी (चाफवडे) व बालवाचक पुरस्कार कु. कादंबरी पांडुरंग धुरी (हाळोली) यांना जाहीर झाला आहे. मंगळवार दि. ६ जानेवारी रोजी डॉ. पूजा पराग सामंत लिखित 'द. ना. गव्हाणकर यांचे शाहिरी वाडमय' या पुस्तकाचे प्रकाशन होणार आहे. कार्यक्रमासाठी ज्येष्ठ समीक्षक, शिवजी विद्यापीठाचे मराठी विभाग प्रमुख डॉ. रणधीर शिंदे कोल्हापूर हे प्रमुख पाहुणे म्हणून उपस्थीत राहणार आहेत. सर्व कार्यक्रम 'मृत्युंजय'कार शिवाजीराव सावंत स्मृतीदालन, जूनी पोष्ट गल्ली आजरा येथे दररोज सायंकाळी ५.३० वाजता होणार आहेत. या व्याख्यानमालेचा, पुरस्कार वितरण व पुस्तक प्रकाशन सोहळयाचा रसिक श्रोत्यांनी लाभ घ्यावा असे आवाहन वाचन मंदिराचे अध्यक्ष वामन सामंत, उपाध्यक्षा विद्या हरेर, कार्यवाह कुंडलिक नावलकर व सहकार्यवाह रवींद्र हुक्केरी यांनी केले आहे.
••••••••••••••••••••••••••••••••••••••••••••••
