आजरा, विकास न्यूज नेटवर्क....
समाजमाध्यमांवरील माहिती ही अधिकृत नसते. ती संभ्रम निर्माण करणारी असते. मात्र मराठी विश्वकोश हेच अधिकृत माहितीचे स्रोत आहेत, असे प्रतिपादन शिवाजी विद्यापीठाचे जनसंपर्क अधिकारी डॉ. आलोक जत्राटकर यांनी येथे केले. राज्य शासनाच्या मराठी विश्वकोश निर्मिती मंडळ, मुंबई आणि आजरा महाविद्यालयातील मराठी विभाग यांच्या संयुक्त विद्यमाने एकदिवसीय विश्वकोश नोंदलेखन कार्यशाळा नुकतीच संपन्न झाली. या कार्यशाळेत उदघाटक म्हणून डॉ. जत्राटकर बोलत होते. जनता एज्युकेशन सोसायटीचे मुख्य कार्यकारी अधिकारी डॉ. अनिल देशपांडे कार्यक्रमाच्या अध्यक्षस्थानी उपस्थित होते.
रोजच्या जीवनव्यवहारात व्हॉट्सअप विद्यापीठाच्या आहारी न जाता अधिकृत माहितीचा स्रोत म्हणून विश्वकोश हाताळले पाहिजेत, असे सांगून डॉ. जत्राटकर पुढे म्हणाले की, एनसायक्लोपीडिया ऑफ ब्रिटानिकाच्या धर्तीवर निर्माण केलेल्या या मराठी विश्वकोशास तर्कतीर्थ लक्ष्मणशास्त्री जोशी यांनी सर्वप्रथम भारतीय चेहरा प्रदान केला. विश्वकोशामध्ये नोंदलेखन करण्यासाठी विश्वकोश निर्मिती मंडळाने संबंधित विषयातील तज्ज्ञ अभ्यासक, लेखक व संशोधकांचे सहाय्य घेण्याचे ठरवले आहे. नोंदलेखन करत असताना ती वस्तुनिष्ठ असली पाहिजे. सत्याशी कोणतीही तडजोड न करता नोंदलेखन केले पाहिजे. तसेच नोंदलेखन करताना पूर्वग्रह नसावा, असेही ते म्हणाले. तीन सत्रामध्ये संपन्न झालेल्या या कार्यशाळेत डॉ. होमी भाभा संशोधन केंद्राचे निवृत्त शास्त्रज्ञ डॉ. विजय लाळे, विश्वकोश निर्मिती मंडळाचे विद्याव्यासंगी सहायक डॉ. स्नेहा खोब्रागडे आणि डॉ. रवींद्र घोडराज यांनी नोंद लेखनासंदर्भात मार्गदर्शन केले.
यावेळी महाविद्यालयाचे प्राचार्य डॉ. अशोक सादळे यांनी कार्यक्रमाचे प्रास्ताविक केले. कार्यशाळेस जनता एज्युकेशन सोसायटीचे संचालक श्री. कृष्णा येसणे, उपप्राचार्य प्रा. दिलीप संकपाळ, पर्यवेक्षक श्री. मनोजकुमार पाटील, कार्यालयीन अधीक्षक श्री. योगेश पाटील यांच्यासह गडहिंग्लज,आजरा, चंदगड, गारगोटी परिसरातील सत्तरहून अधिक प्राध्यापक, संशोधक व अभ्यासक यांनी सहभाग नोंदवला. कार्यशाळेचे सूत्रसंचालन डॉ. आप्पासाहेब बुडके यांनी केले तर कार्यशाळेचे समन्वयक मराठी विभाग प्रमुख डॉ. आनंद बल्लाळ यांनी उपस्थितांचे आभार मानले.
°°°°°°°°°°°°°°°°°°°°°°°°°°°°°°°°
No comments:
Post a Comment