ये तो ट्रेलर है, पिक्चर अभी बाकी है...: अर्जुन आबिटकर यांचे घाटकरवाडी येथे सूचक विधान; पेरणोली जि. प. उमेदवार विष्णुपंत केसरकर यांना बाळ केसरकर यांच्यासह अनेकांचा पाठिंबा...

आजरा, विकास न्यूज नेटवर्क....
पेरणोली जिल्हा परिषद मतदार संघातील शिवसेना शिंदे गटाचे उमेदवार विष्णुपंत केसरकर यांना अनिरुद्ध उर्फ बाळ केसरकर यांनी आपल्या समर्थकांसह पाठिंबा दिला. बाळ केसरकर यांचा पाठिंबा हा फक्त ट्रेलर आहे, पिक्चर अभी बाकी है, असे जिल्हा बँकेचे संचालक अर्जुन आबिटकर यांनी घाटकरवाडी (ता. आजरा) येथे सूचक विधान केले. यामुळे पुढील दोन-चार दिवसात शिवसेना उमेदवार विष्णुपंत केसरकर यांना मोठा पाठिंबा मिळणार असल्याची चर्चा मतदारसंघात सुरू आहे. यावेळी पेरणोली जिल्हा परिषद मतदार संघातील इच्छुक उमेदवार सुरेश पाटील यांनी विष्णुपंत केसरकर यांना जाहीर पाठिंबा देत आपली उमेदवारी माघार घेत असल्याचे स्पष्ट केले.

बाळ केसरकर यांच्या समर्थकांच्या मेळाव्याचे स्वागत सुळेरानचे सरपंच शशिकांत कांबळे यांनी करून मेळाव्याचा उद्देश स्पष्ट केला. यावेळी जिल्हा बँक संचालक अर्जुन आबिटकर म्हणाले, बाळ केसरकर व सुरेश पाटील यांनी योग्यवेळी योग्य निर्णय घेतला आहे. आगामी काळात त्यांचा योग्य तो सन्मान केला जाईल. घाटकरवाडी व परिसराच्या विकासासाठी निधी देण्यामध्ये कुठेही कमी पडणार नाही. पालकमंत्री प्रकाश आबिटकर यांना हा भाग जसे मताधिक्य देतो तसेच मताधिक्य जिल्हा परिषद व पंचायत समितीच्या उमेदवारांना द्यावे. पालकमंत्री आबिटकर यांच्या माध्यमातून या भागाचा विकास करण्यासाठी आम्ही कटिबद्ध आहोत. विकासाभिमुख कामामुळे शिवसेना शिंदे गटाच्या प्रवाहात सामील होण्यास अनेक मंडळी तयार आहेत. अनिरुद्ध उर्फ बाळ केसरकर म्हणाले, घाटकरवाडी परिसराच्या विकासासाठी या भागातील व्यक्तीचा पंचायत समिती स्वीकृत किंवा तालुक्यातील समिती सदस्यासाठी विचार व्हावा. यावेळी जिल्हा परिषद उमेदवार विष्णुपंत केसरकर, पंचायत समिती उमेदवार श्वेता सरदेसाई, राजू पोतनीस, सहदेव नेवगे, उपजिल्हाप्रमुख राजेंद्र सावंत, तालुकाप्रमुख संजय पाटील, विजय थोरवत, संतोष भाटले, जितेंद्र भोसले, संकेत सावंत, संतोष पाटील, डॉ. तानाजी जाधव, शंकर पाटील (आंबाडे), सागर पाटील (किटवडे), देवदास सावंत (किटवडे), जयसिंग पाटील यांच्यासह परिसरातील नागरिक उपस्थित होते. गंगाराम डेळेकर यांनी आभार मानले.
°°°°°°°°°°°°°°°°°°°°°°°°°°°°°°°°°°°°