आजरा नगरपंचायत निवडणुकीत मतदारांनी अभूतपूर्व सहभाग नोंदवला. 77 % पेक्षा जास्त मतदानाचा उत्साह म्हणजे शहराच्या राजकीय जाणिवेची जिवंत साक्ष. पण मतदानाच्या दिवशी उमटलेली ही ऊर्जा निकालाच्या दिवशी मात्र शांत प्रतीक्षेत बदलली आहे. कारण ३ डिसेंबरला होणारी मतमोजणी काहीच तास आधी पुढे ढकलण्यात आली. आता निकाल २१ डिसेंबर २०२५ रोजी जाहीर केला जाणार आहे. नागपूर खंडपीठाच्या निर्देशांनुसार आणि अन्य स्थानिक स्वराज्य संस्थांच्या टप्प्यांची सांगड घालत घेतलेला हा निर्णय आजऱ्याच्या जनतेसाठी अनपेक्षित ठरला.
मतदान पूर्ण झाले, EVM मशीन सीलबंद झाली, उमेदवारांनी विजयाच्या शक्यतांच्या चर्चा सुरू केल्या… आणि अचानक सर्व काही थांबले. उमेदवार आणि कार्यकर्ते १८ दिवसांच्या प्रतीक्षेत तणावाखाली आहेत. प्रत्येक दिवस कल्पना, चिंता आणि संभाव्य समीकरणांनी भरलेला. कोण जिंकणार, कोण मागे पडेल, कोणते गठबंधन उभे राहील, या सर्व चर्चांच्या पार्श्वभूमीवर शहर एक शांत निरीक्षकासारखे उभे आहे. मतदाराने मशीनमध्ये टाकलेले बटण हे केवळ मतदान नसते, ते भविष्यासाठी लिहिलेला निर्णय असतो. आणि तो निर्णय सुरक्षित, शाबूत आणि पारदर्शक राहिला पाहिजे. तरीही, एक गोष्ट स्पष्ट आहे, निकाल कितीही पुढे ढकलला, आजऱ्याच्या नागरिकांनी आपल्या मताने दिलेला संदेश मशीनमध्ये बंद आहे आणि तो उघडण्याची वेळ येणारच आहे. लोकशाहीची खरी कसोटी मतदानाच्या दिवशी नाही, तर निकालाच्या प्रतीक्षेत आहे. आजरा त्या कसोटीतून जात आहे. विश्वास आणि संयम या दोन गोष्टींची आज परीक्षा आहे. शहर शांत आहे, पण आतून उत्सुक आहे. २१ डिसेंबर हा फक्त आकडा नाही, तो हजारो मतदारांच्या उत्तराची कडी आहे.
No comments:
Post a Comment