आजरा महाविद्यालय, आजरा येथे भारतरत्न डॉ. बाबासाहेब आंबेडकर यांची जयंती मोठ्या उत्साहात आणि अभिमानपूर्वक साजरी करण्यात आली. कार्यक्रमाची सुरुवात महाविद्यालयाचे प्राचार्य डॉ. अशोक सादले यांच्या हस्ते डॉ. बाबासाहेब आंबेडकर यांच्या प्रतिमेचे पूजन करून करण्यात आली. या कार्यक्रमासाठी प्रमुख वक्ते म्हणून डॉ. केशव देशमुख यांना आमंत्रित करण्यात आले होते. त्यांनी आपल्या भाषणात डॉ. आंबेडकरांच्या कार्याचा आणि विचारांचा सखोल परामर्श घेतला.
प्रा. देशमुख म्हणाले, “डॉ. बाबासाहेब आंबेडकर हे केवळ संविधानकार नव्हते, तर ते एका व्यापक सामाजिक क्रांतीचे प्रणेते होते.” त्यांनी आपल्या भाषणात बाबासाहेबांनी कोल्हापूर संस्थानात शाहू महाराजांच्या मदतीने अस्पृश्य मुलांना शिक्षणाची दारे खुली करून दिल्याचे उदाहरण दिले. तसेच त्यांनी बाबासाहेबांचे महाड चवदार तळे सत्याग्रह (१९२७) आणि नाशिकचा काळाराम मंदिर प्रवेश आंदोलन (१९३०) यांचा विशेष उल्लेख केला, जे समाजात समानतेचा अधिकार मिळवण्यासाठी लढलेले ऐतिहासिक टप्पे होते. प्रा. देशमुख यांनी असेही उदाहरण दिले की, “डॉ. आंबेडकरांनी कोलंबिया आणि लंडन स्कूल ऑफ इकॉनॉमिक्समध्ये उच्च शिक्षण घेतले, पण त्यांनी ते केवळ स्वतःच्या उन्नतीसाठी वापरले नाही, तर त्या ज्ञानाचा उपयोग संपूर्ण समाजाच्या प्रगतीसाठी केला. ‘शिका, संघटित व्हा आणि संघर्ष करा’ हा त्यांचा मंत्र आजही तरुणांसाठी मार्गदर्शक ठरतो.” त्यांनी सांगितले की आजच्या तरुणांनी बाबासाहेबांचे विचार केवळ वाचनापुरते मर्यादित न ठेवता, त्यांचे आचरण आपल्या जीवनात उतरवावे. “बाबासाहेबांनी सांगितलेली समानता, बंधुता आणि न्याय या मूल्यांची जाणीव ठेवून आपण समाजात बदल घडवू शकतो,” असे ते शेवटी म्हणाले.
कार्यक्रमाचे स्वागत व प्रास्ताविक डॉ. रणजीत पवार यांनी केले, सूत्रसंचालन व आभार प्रा. विठ्ठल हाक्के यांनी व्यक्त केले. कार्यक्रमासाठी कार्यालयीन अधीक्षक योगेश पाटील, डॉ. राजीव करपे, प्रा. बाळासाहेब कांबळे, प्रा. शुभांगी सावंत यांच्यासह महाविद्यालयातील सर्व प्राध्यापक, शिक्षकेत्तर कर्मचारी आणि विद्यार्थी मोठ्या संख्येने उपस्थित होते.
=================
No comments:
Post a Comment