'लाडकी बहीण'चा जानेवारीचा हप्ता २६ जानेवारीपूर्वी मिळणार

मुंबई, वृत्तसंस्था :

मुख्यमंत्री माझी लाडकी बहीण योजनेच्या लाभार्थीना जानेवारी महिन्याचा हप्ता २६ जानेवारी पूर्वी दिला जाणार आहे. या योजनेचा जानेवारी महिन्याचा हप्ता देण्यासाठी ३ हजार ६९० कोटी रुपयांचा निधी वितरित करण्याच्या प्रस्तावाला मंत्रिमंडळाने मान्यता दिली आहे.

या योजनेसाठी राज्याच्या तिजोरीत निधी नसल्याची ओरड विरोधकांकडून करण्यात येत आहे. मात्र त्यासाठी पुरेसा निधी शासनाकडे असून त्यातूनच लाभार्थ्यांना पैसे दिले जात असल्याचे महिला व बालकल्याण विभागाच्या अधिकाऱ्याने सांगितले. या योजनेसाठी जानेवारी महिन्यासाठी आवश्यक असलेल्या ३ हजार ६९० कोटी रुपयांच्या निधीला मंत्रिमंडळ बैठकीत मंजुरी देण्यात आली असून, २६ जानेवारीपूर्वी हा निधी लाभार्थी महिलांच्या खात्यावर जमा केला जाईल, असे या विभागाच्या मंत्री आदिती तटकरे यांनी सांगितले. मुख्यमंत्री लाडकी बहीण योजनेअंतर्गत पात्र महिलांना दर महिना १ हजार ५०० रुपये दिले जातात. आत्तापर्यंत या योजनेचे सहा हप्ते लाभार्थी महिलांना मिळाले आहेत. त्याचबरोबर विधानसभा निवडणुकीनंतर महिलांना डिसेंबर महिन्याचा हप्ता देण्यात आला आहे. त्यानंतर जानेवारीचा हप्ता कधी मिळणार, याकडे महिलांचे लक्ष आहे. या महिन्याचा हप्ताही आगामी आठ दिवसाच्या काळात लाभार्थी महिलांच्या खात्यावर जमा होऊ शकतो.

=================