श्री रवळनाथ हौसिंग सोसायटीसह झेप ॲकॅडमीने परिवर्तनाची चळवळ उभी केली आहे, हे कौतुकास्पद असल्याचे गौरवोद्गार काढत झेप ॲकॅडमीने सशक्त नागरिक बनविण्याचे काम करावे असे प्रतिपादन नवी दिल्ली विदेश मंत्रालयाचे माजी राजदूत व सचिव डॉ. ज्ञानेश्वर मुळे यांनी केले. ज्ञानदीप प्रबोधिनी गडहिंग्लज संचलित झेप ॲकॅडमी आजरा शाखेचा शुभारंभ डॉ. मुळे यांच्या हस्ते झाला. कार्यक्रमाच्या अध्यक्षस्थानी संस्थापक अध्यक्ष एम.एल.चौगुले होते.
प्रास्ताविक मिना रिंगणे यांनी केले. गडहिंग्लज येथील झेप संस्थेच्या कार्याचा आढावा घेतला. यावेळी बोलताना डॉ मुळे म्हणाले, अध्यक्ष चौगुले व त्यांच्या सहकाऱ्यांमध्ये विचार आहेत त्यामुळेच नवी दिवाळी आणण्याचे काम ज्ञानदीप व रवळनाथ करीत आहे. अपयशाचा उल्लेख कधीच होत नसतो मात्र अपयश हे प्रेक्षणीय असावे. आज परीक्षेत मार्कांना अग्रक्रम दिला जातो मात्र या मार्कांमधून गुणांचे दर्शन होत नाही. मंत्र, तंत्र व यंत्र जीवनात नसेल तर प्रगती होवू शकत नाही.आज संधींची कमतरता नाही.शासनाने संधी उपलब्ध करून दिल्या आहेत त्याचा उपयोग करता आला पाहिजे.जनतेने लोकप्रतिनिधींना वेठीस धरले पाहिजे.शहराकडे जाण्यापेक्षा स्थानिक पातळीवर संधी उपलब्ध करून दिल्या गेल्या पाहिजेत.
शहरी प्रमाणे ग्रामीण भागातील विद्यार्थी प्रशासकीय सेवेत जावेत या उद्देशाने आजरा येथे झेप ॲकॅडमीची शाखा काढली आहे.सुसज्ज अभ्यासिकासह स्पर्धा परीक्षा मार्गदर्शन केले जाणार असून याचा विद्यार्थ्यांनी उपयोग करून घ्यावा असे आवाहन अध्यक्ष एम.एल.चौगुले यांनी केले.यावेळी अशोक चराटी, जयवंतराव शिंपी व आजऱ्याचे सपोनि नागेश यमगर यांनी मनोगत व्यक्त केले.आभार संदीप कागवाडे यांनी मानले. कार्यक्रमास डॉ.अनिल देशपांडे, आप्पा मायदेव, बी. एस. पाटील, श्री रवळनाथ हौसिंग सोसायटीचे संचालक, मुख्य कार्यकारी अधिकारी मायदेव, ॲड. सचिन इंजल, जितेंद्र शेलार यांच्यासह विद्यार्थी व पालक उपस्थित होते.
================
No comments:
Post a Comment